वासिङ्टन डिसी । अमेरिकी राष्ट्रपति डोनाल्ड ट्रम्पको सक्रियतामा लेबनान र इजरायलबिचको युद्धविराम थप तीन हप्ताका लागि लम्बिएको छ। ह्वाइट हाउसको ओभल अफिसमा दुवै देशका राजदूतहरूसँगको उच्चस्तरीय वार्तापछि ट्रम्पले यो युद्धविरामको अवधि बढाउने सहमति भएको घोषणा गरेका हुन्।
इजरायली आक्रमणमा एक पत्रकारसहित पाँच जनाको ज्यान गएको भोलिपल्टै भएको यो वार्तालाई पश्चिम एसियामा तनाव कम गर्ने महत्त्वपूर्ण कडीको रूपमा हेरिएको छ। ट्रम्पले सामाजिक सञ्जाल ट्रुथ सोसलमा बैठक निकै सकारात्मक रहेको उल्लेख गर्दै अमेरिकाले लेबनानलाई हिजबुल्लाहबाट जोगिन मद्दत गर्ने प्रतिबद्धतासमेत जनाएका छन्।
ट्रम्पले आगामी दिनमा इजरायली प्रधानमन्त्री बेन्जामिन नेतान्याहु र लेबनानी राष्ट्रपति जोसेफ आउनलाई ह्वाइट हाउसमै स्वागत गर्न आफू आतुर रहेको बताएका छन्। उनले यी दुई देशबिच यसै वर्ष स्थायी शान्ति सम्झौता हुने बलियो सम्भावना रहेको दाबी गर्दै लेबनानलाई फेरि महान् बनाउन अमेरिकाले सहयोग गर्ने वाचा गरे।
युद्धविराम लम्बिए पनि लेबनानको दक्षिणी क्षेत्रमा भने तनाव कायमै छ। इजरायली सेनाले त्यहाँ बफर जोन बनाएर कब्जा जमाएको छ भने छिटपुट आक्रमणका घटनाहरू भइरहेका छन्।
लेबनानी राजदूत मोवाडले ट्रम्पको सहयोगप्रति आभार प्रकट गर्दै लेबनानलाई पुनर्जीवन दिने आशा व्यक्त गरेकी छन्। तर लेबनानले अर्को चरणको वार्तामा इजरायली सेनाको फिर्ता, हिरासतमा रहेका आफ्ना नागरिकहरूको रिहाइ र सीमांकनको मुद्दालाई मुख्य रूपमा उठाउने तयारी गरेको छ।
अप्रिल १६ देखि लागू भएको यो युद्धविरामपछि गत बुधबार लेबनानका लागि सबैभन्दा घातक दिन सावित भएको थियो। इजरायली हवाई आक्रमण र गोलाबारीमा अल-अखबार अखबारकी पत्रकार अमल खलिलको ज्यान गएको थियो। हिजबुल्लाहले इजरायलले युद्धविरामको पूर्ण पालना गर्नुपर्ने सर्त राख्दै आफ्ना प्रतिरोधका गतिविधिहरू जारी राख्ने बताएको छ।
इरानसँगको क्षेत्रीय युद्धका कारण सुरु भएको यो द्वन्द्वमा अहिलेसम्म लेबनानमा करिब २ हजार ५ सय मानिसले ज्यान गुमाइसकेका छन्।
सम्वन्धित समाचार
:
